Түркістан облысында құқық бұзушылықтың алдын алуға бағытталған жаңа форматтағы профилактикалық кабинеттер іске қосылуда. Енді барлық қалалық және аудандық полиция бөлімдерінде азаматтарға кешенді көмек көрсететін арнайы алаңдар жұмыс істейді. Профилактикалық кабинет — ведомствоаралық өзара іс-қимыл орталығы. Мұнда психологтар, наркологтар, әлеуметтік қызметкерлер және өзге де сала мамандары тұрғындармен бірлесіп жұмыс жүргізеді. Негізгі мақсат — құқық бұзушылыққа жол бермей, мәселені ерте кезеңде шешу.Кабинеттерде отбасылық-тұрмыстық жанжалдар, тұрмыстық зорлық-зомбылық, нашақорлық, маскүнемдік, буллинг пен девиантты мінез-құлықтың алдын алуға бағытталған профилактикалық шаралар жүзеге асырылады. Әсіресе отбасы институтын нығайту мен жастар арасындағы құқық бұзушылықтың алдын алу басты назарда.Жаңа тәсіл алғашқы нәтижесін де көрсете бастады. Отбасылық-тұрмыстық қатынастар саласында құқық бұзушылық жасаған 17 тұрғынға қатысты профилактикалық шаралар қабылданып, қорғау нұсқамалары шығарылды. Ал 28 азамат профилактикалық есепке алынып, олармен тұрақты түсіндіру және бақылау жұмыстары жүргізілуде.
ПОЛИЦИЯ БӨЛІМДЕРІНІҢ ЖАНЫНАН ЖАҢА ПРОФИЛАКТИКАЛЫҚ КАБИНЕТТЕР АШЫЛДЫ
