Шымкент гарнизонында әскери көліктердің техникалық жағдайы тексерілді. Әскери полиция қызметкерлері бөлімдер мен мекемелердегі көлік тұрақтарын аралап, техниканың талапқа сай болуын бақылауға алды. Негізгі мақсат — әскери көліктерді пайдалану кезінде қауіпсіздікті қамтамасыз ету, жол-көлік оқиғалары мен түрлі құқық бұзушылықтардың алдын алу. Тексеру кезінде жеке құрамды тасымалдайтын барлық көлік қаралды. Әскери полиция мамандары көліктердің сыртқы жағдайына, техникалық жарамдылығына және қажетті құрал-жабдықтармен қамтамасыз етілуіне назар аударды.
Сонымен қатар жүргізушілердің құжаттары да тексерілді. Атап айтқанда, әскери билеті мен көлікті басқаруға рұқсат беретін жүргізуші куәлігінің бар-жоғы қаралды. Әскери полиция өкілдерінің айтуынша, мұндай тексерулер тұрақты түрде жүргізіліп тұрады. Себебі әскери техника күнделікті қызметте ғана емес, оқу-жаттығу кезінде де кез келген тапсырманы орындауға дайын болуы тиіс. Тексеру барысында көліктердің қауіпсіздігі мен техникалық дайындығына баға берілді. Мамандар анықталған кемшіліктерді уақытылы жою — әскери техниканы қауіпсіз пайдаланудың басты талаптарының бірі екенін атап өтті.